Luonddubargguid birra

Luonddubargguin mánáidgárdemánát besset vásihit luondduilu lagašbirrasis. Mánát ja ollesolbmot mannet mátkái ovttas ja suokkardit, fuomášit, áicet, stohket ja ráhkadit bargguid ja aktivitehtaid bokte lagašluonddus.

Garjá Kåre dat barggaha mánáid. Dat lea sáhkkes ja diehtoáŋgiris loddi mii barggaha mánáid ja jearrá olu suokkardalli gažaldagaid.

Sáhttibehtet go dii ovttas veahkehit Garjjá Kåre gávdnat vástádusaid?

Luonddubargguid ulbmiljoavku leat 2–6-jahkásaš mánáidgárdemánát. Bargguide ii dárbbaš olu ráhkkanit, ii pedagogalaččat ii ge ohcat ávdnasiid. Bargguid bagadus lea nu álki ahte maiddái sadjásaš fáhte barggu sisdoalu oanehis áiggis. Luonddubarggut gokčet olu surggiid Mánáidgárddi rámmaplánas.

Garjá lea válljejuvvon Luonddubargguid maskohttan, danne go dát jierbmás loddi gávdno miehtá Norgga ja eanaš mánáidgárdemánát dovdet dan. Garjá Kåre lea jo šaddan beakkálmassan dain mánáidgárddiin mat leat leamaš mielde dássážii.

Luonddubargguin leat olu iešguđetlágan fáttát mat leat čadnon lagašluonddu suokkardallamii, ja eambbo barggut bohtet boahttevaš jagiin.

Juohke fáttás lea okta váldobargu ja njeallje oassebarggu. Dii válljebehtet ieža maid bargguid bargabehtet ja man vuorus.

Buot aktivitehtaid mat leat neahttasiiddus, sáhttá viežžat ja geavahit mánáidgárddis. Jus du mánáidgárddis lea miella čállit raportta Garjái Kårii ja oažžut somás máhcahagaid ja buriid rávvagiid, de coahkkalat «Mu siidu» ja ráhkadat iežat mánáidgárdejoavkku. Dalle oainnát buot fáttáid ja bargguid, maid lehpet addán sisa ja maid bargguid vel galgabehtet bargat. Garjá Kåre maiddái jámma muittuha ja čuovvola e-poasttaiguin.

Dii sáhttibehtet álgit bargguiguin jo dalle go mánáidgárdi álgá borgemánus. Sáhttá sáddet bargguid sisa Garjái Kårii čakčamánu 1. b. rájes.

Lea dieđusge nuvttá leat mielde.

Mis lea gilvu juohke mánáidgárdejagi jagiin 2024–2027. Buot mánáidgárddit geat sáddejit sisa unnimustá vihtta váldobarggu mánáidgárdejagi áigge, leat mielde vuorbádeamis vuoitit 10 skeaŋkakoartta à kr 1000,- neahttasiiddus Natur og Fritid. Go čađaha vihtta váldobarggu, de beassá maiddái viežžat diploma Garjjás Kåres.

Háliidan dieđihit min mánáidgárddi Luonddubargguide

Galledanguovddážat Norggas ja Naturfagsenteret dat leat ráhkadan Luonddubargguid.

Galledanguovddážat Norggas ožžot jahkásaš ruhtadeami stáhtabušeahtas gaskkustit máhtu luonddu- ja kulturbirrasiid birra. Gávdnojit 41 dákkár guovddáža miehtá Norgga.

Naturfagsenteret lea nationála guovddáš luonddufágii oahpahusas. Sis lea earret eará ovddasvástádus resursasiidui forskerfrø.no, mii lea mánáidgárddiid várás.

Norgga galledanguovddážat ja Naturfagsenteret ožžo 2023:s doarjaga Sparebankstiftelsen DNB:s viidásit ovdánahttit konseaptta ja fállat Luonddubargguid buot Norgga mánáidgárddiide áigodagas 2024–2027.

Birasdirektoráhtta doarjjui prošeavtta ruđalaččat pilohtamuttus ja doarju ain prošeavtta.

Besøkssenter våtmark Ilene Tønsbergas dat formálalaččat lea prošeaktaeaiggát.

Leat go gažaldagat Luonddubargguid birra?

Váldde áinnas oktavuođa minguin!

Luonddubargguid govvasárgu lea Bjørn Henrik Stavdahl Johansen Naturveilederenis. Sus lea dahkkivuoigatvuohta buot illustrašuvnnaide. Prošeavttas lea riekti geavahit illustrašuvnnaid ja buot eará gráfalaš materiálaid mat ráhkaduvvojit Luonddubargguin.

Vuos sáhttet dušše mánáidgárddit dieđihit iežaset luonddubargguide, muhto priváhtaolbmot ja fitnodagat sáhttet geavahit bargguid, muhto ii fal kommersiealla ulbmiliidda, eai ge galgga manipulerejuvvot eai ge geavahuvvot eará oktavuođain go Luonddubargguin.

Váldde oktavuođa stivrenjoavkkuin jus it dieđe sáhttá go illustrašuvnnaid dahje materiála geavahit eará oktavuođain.